തിരുവനന്തപുരം: സംസ്ഥാനത്ത് ലോക്ഡൗൺ നിയന്ത്രണങ്ങൾ മാറ്റി. ടി.പി.ആർ അടിസ്ഥാനമാക്കിയുള്ള നിയന്ത്രണങ്ങൾ പിൻവലിച്ചു. രോഗികളുടെ എണ്ണമായിരിക്കും ഇനി മുതൽ മാനദണ്ഡമാക്കുക. നാളെ മുഖ്യമന്ത്രി നിയമസഭയിൽ പുതിയ ലോക്ഡൗൺ മാനദണ്ഡത്തെ കുറിച്ച് പ്രഖ്യാപനം നടത്തും.
ഇനി മുതൽ കടകൾക്ക് തിങ്കൾ മുതൽ ശനി വരെ തുറക്കാം. ഞായാറാഴ്ച മാത്രമായിരിക്കും വാരാന്ത്യ ലോക്ഡൗൺ ഉണ്ടാവുക. ഇളവുകൾ അടുത്തയാഴ്ച മുതൽ പ്രാബല്യത്തിൽ വരും.
ഒരാഴ്ചയിലെ രോഗികളുടെ എണ്ണം പരിശോധിച്ചാണ് നിയന്ത്രണങ്ങളും ഇളവുകളും തീരുമാനിക്കുക. രോഗികളുടെ എണ്ണം കൂടുതലുള്ള മേഖലകളിൽ കടുത്ത നിയന്ത്രണം ഏർപ്പെടുത്തും. രോഗികളുടെ എണ്ണം കുറവുള്ള സ്ഥലങ്ങളിൽ ഇളവ് അനുവദിക്കും.
നേരത്തെ ടി.പി.ആർ അടിസ്ഥാനമാക്കിയുള്ള നിയന്ത്രണങ്ങൾക്കെതിരെ വലിയ വിമർശനം ഉയർന്നിരുന്നു. പ്രതിപക്ഷവും വ്യാപാര സംഘടനകളും വിമർശനവുമായി രംഗത്തെത്തിയിരുന്നു. ഇതിന് പിന്നാലെയാണ് ലോക്ഡൗൺ മാനദണ്ഡങ്ങളിൽ മാറ്റം വരുത്താൻ സർക്കാർ തീരുമാനിച്ചിരിക്കുന്നത്.
