നീലേശ്വരം: കള്ളിൽ ഈഥേൽ ആൽക്കഹോളിന്റെ അളവ് നിയമപ്രകാരമുള്ളതിൽനിന്ന് കൂടിയതിനാൽ ആറ് കള്ളുഷാപ്പുകൾ എക്സൈസ് സംഘം പൂട്ടിച്ചു.
നീലേശ്വരം റെയ്ഞ്ചിന് കീഴിലെ കരിന്തളം, കിനാനൂർ, കാട്ടിപ്പൊയിൽ, കാഞ്ഞിരപ്പൊയിൽ, തീയർപാലം, എരിക്കുളം എന്നിവിടങ്ങളിലെ ഷാപ്പുകളാണ് അടപ്പിച്ചത്.
ഷാപ്പുകളുടെ ഉടമയായ പെരിയങ്ങാനം സ്വദേശി ഇ.കെ. രഘുവിന്റെ (55) പേരിൽ എക്സൈസ് ഹൊസ്ദുർഗ് സർക്കിൾ ഇൻസ്പെക്ടർ അശോക് കുമാർ കേസെടുത്തു.
2020-ലാണ് ഈ ഷാപ്പുകളിൽനിന്ന് നീലേശ്വരം റെയ്ഞ്ചിലെ ഉദ്യോഗസ്ഥർ കള്ളിന്റെ സാമ്പിൾ പരിശോധനയ്ക്കായി കോഴിക്കോട് കെമിക്കൽ ലാബിലേക്ക് അയക്കുന്നത്. നിയമപ്രകാരം 8.1 ശതമാനം ഈഥേൽ ആൽക്കഹോളിൽ കവിയരുതെന്നാണ് കണക്ക്.
എന്നാൽ പരിശോധനയിൽ 13 ശതമാനം ഈഥേൽ ആൽക്കഹോൾ അടങ്ങിയതാണ് കേസെടുക്കാൻ കാരണം.
