നിലേശ്വരം: അലക്കികൊണ്ടിരിക്കെ വാഷിങ് മെഷീൻ പൊട്ടിത്തെറിച്ചു. മരം മുറിക്കുന്നതിനിടെ വൈദ്യുതി ലൈൻ കൂട്ടിമുട്ടിയതാണ് അപകടകാരണമെന്ന് സംശയിക്കുന്നു.
പരപ്പ, ക്ലായിക്കോട് റോഡരികിൽ താമസിക്കുന്ന ഓടോറിക്ഷാ ഡ്രൈവർ സി ക മൊയ്തീൻകുഞ്ഞിയുടെ വീട്ടിൽ ചൊവ്വാഴ്ചഉച്ചയോടെയാണ് സംഭവം.
വീടിന് സമീപത്ത് മരം മുറിക്കുമ്പോൾ മരത്തിന്റെ ശിഖിരം വൈദ്യുത കമ്പിയിൽ തട്ടി ലൈനുകൾ കൂട്ടിയിടിച്ചപ്പോഴാണ് വാഷിങ് മെഷീൻ പൊട്ടിത്തെറിച്ചതെന്നാണ് വിവരം.
ശബ്ദവും കരിഞ്ഞ മണവും ഉണ്ടായതോടെ എത്തി നോക്കിയപ്പോഴാണ് വാഷിങ് മെഷീൻ പൊട്ടിത്തെറിച്ചതായി കണ്ടത്. ഒരു വർഷം മുമ്പ് വാങ്ങിയ വാഷിങ് മെഷീനാണ് കത്തിയത്. വാഷിങ് മെഷീൻ ഓൺ ചെയ്ത് വീടിന് താഴേക്ക് പോയതുകൊണ്ടാണ് ആളപായം ഒഴിവായത്.
ഇക്കഴിഞ്ഞ ശനിയാഴ്ചയാണ് മൊയ്തീൻകുഞ്ഞിയുടെ മകളുടെ വിവാഹം കഴിഞ്ഞത്. ഇതിന്റെ ഭാഗമായി നിരവധി ഇലക്ട്രോണിക്സ് ഉപകരണങ്ങൾ വാങ്ങിയിരുന്നെങ്കിലും ഭാഗ്യം കൊണ്ട് മറ്റൊന്നിനും കേടുപാടുകൾ സംഭവിച്ചില്ല.
