ചെറുവത്തൂര്: മഞ്ചേശ്വരത്തെ മുന് എം എല് എയും മുസ്ലീംലീഗുനേതാവുമായ എം സി ഖമറുദ്ദീന്റെ വീടു വളഞ്ഞ സംഭവത്തില് 35 പേര്ക്കെതിരെ ചന്തേര പൊലീസ് കേസെടുത്തു. എം സി ഖമറുദ്ദീന്റെ ഭാര്യ റംലയുടെ പരാതിയിന്മേലാണ് കേസെടുത്തത്.
ഇന്നലെ ഉച്ചയോടെ എടച്ചാക്കൈയിലുള്ള എം സി ഖമറുദ്ദീന്റെ വീടാണ് വളഞ്ഞത്.
ഖമറുദ്ദീന് ചെയര്മാനായ ഫാഷന് ഗോള്ഡ് ജ്വല്ലറി നിക്ഷേപ തട്ടിപ്പില് കുടുങ്ങിയവരാണ് വീടു വളഞ്ഞത്. തട്ടിപ്പില് കുടുങ്ങി പണം നഷ്ടപ്പെട്ട ചെറുവത്തൂര്, പടന്ന, വലിയ പറമ്പ, പിലിക്കോട് പ്രദേശങ്ങളില് നിന്നും എത്തിയ 35വോളം പേരാണ് വീടുവളഞ്ഞത്. എന്നാല് ഖമറുദ്ദീന് വീട്ടില് ഇല്ലെന്നു പറഞ്ഞുവെങ്കിലും ആള്ക്കാര് പോകാന് തയ്യാറായില്ല. ഒടുവില് ചന്തേര പൊലീസെത്തി സംസാരിച്ച ശേഷമാണ് ആള്ക്കാര് പിരിഞ്ഞു പോയത്.തുടര്ന്ന് ഖമറുദ്ദീനെ കൊന്നു കളയുമെന്നു ഭീഷണിപ്പെടുത്തിയെന്നും തന്നെ അസഭ്യം പറഞ്ഞതായും കാണിച്ച് ഭാര്യ റംല പൊലീസില് പരാതി നല്കി.
