ജില്ലയില് ഇന്ന് ശക്തമായ മഴയ്ക്കു സാധ്യതയുള്ളതിനാല് കേന്ദ്ര കാലാവസ്ഥാ വകുപ്പ് യെല്ലോ അലേര്ട്ട് പ്രഖ്യാപിച്ചു. 24 മണിക്കൂറില് 64.5 മുതല് 115 മില്ലി മീറ്റര് വരെ അളവില് ശക്തമായ മഴ പെയ്യാനാണു സാധ്യത. കനത്ത മഴയെത്തുടര്ന്ന് മാറ്റിപ്പാര്പ്പിക്കേണ്ട സാഹചര്യമുണ്ടായാല് പൊതുജനങ്ങള് അധികൃതരോടു സഹകരിക്കണമെന്നു കളക്ടര് അഭ്യര്ഥിച്ചു. തീരങ്ങളില് കടലാക്രമണം ശക്തമാകാന് സാധ്യതയുള്ളതിനാല് അപകട മേഖലകളില് താമസിക്കുന്നവര് ജാഗ്രത പാലിക്കണം. ആവശ്യമായ ഘട്ടത്തില് മാറി താമസിക്കണം. മത്സ്യബന്ധനോപാധികള് സുരക്ഷിതമാക്കിവയ്ക്കണം. അടച്ചുറപ്പില്ലാത്ത വീടുകളില് താമസിക്കുന്നവരും മേല്ക്കൂര ശക്തമല്ലാത്ത വീടുകളില് താമസിക്കുന്നവരും മുന്നറിയിപ്പുകളുടെ അടിസ്ഥാനത്തില് സുരക്ഷയെ മുന്കരുതി മാറി താമസിക്കാന് തയാറാകണം. സ്വകാര്യ-പൊതു ഇടങ്ങളില് അപകടവസ്ഥയില് നില്ക്കുന്ന മരങ്ങള്, പോസ്റ്റുകള്, ബോര്ഡുകള് തുടങ്ങിയവ സുരക്ഷിതമാക്കുകയും മരങ്ങള് കോതി ഒതുക്കുകയും ചെയ്യണം. അപകടാവസ്ഥകള് അധികൃതരുടെ ശ്രദ്ധയില്പ്പെടുത്തണം. ദുരിതാശ്വാസ ക്യാമ്പുകളിലേക്ക് മാറേണ്ടുന്ന ഘട്ടങ്ങളില് പൂര്ണമായും കോവിഡ് മാനദണ്ഡങ്ങള് പാലിക്കാന് തയാറാകണമെന്നും കളക്ടര് അഭ്യര്ഥിച്ചു.
