തിരുവനന്തപുരം: അടുത്ത 12 മണിക്കൂറില് വടക്ക്, മധ്യ പടിഞ്ഞാറന് ബംഗാള് ഉള്ക്കടല്, ഒഡിഷ, വെസ്റ്റ് ബംഗാള്, വടക്കന് ആന്ധ്രാ പ്രദേശ് തീരങ്ങള് എന്നിവിടങ്ങളില് മണിക്കൂറില് 50 മുതല് 60 കി.മീ വരെ വേഗതയിലും ചില അവസരങ്ങളില് 70 കി.മീ വരെ വേഗതയിലും വീശിയടിച്ചേക്കാവുന്ന ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
മധ്യ കിഴക്കന്, തെക്കന് ബംഗാള് ഉള്ക്കടലില് ഇന്ന്(13 സെപ്റ്റംബര്) മണിക്കൂറില് 40 മുതല് 50 കി.മീ വരെ വേഗതയിലും ചില അവസരങ്ങളില് 60 കി.മീ വരെ വേഗതയിലും വീശിയടിച്ചേക്കാവുന്ന ശക്തമായ കാറ്റിനും തെക്ക് – പടിഞ്ഞാറന്, മധ്യ – പടിഞ്ഞാറന് അറബിക്കടലില് ഇന്നു (സെപ്റ്റംബര് 13) മുതല് 17 വരെ മണിക്കൂറില് 40 മുതല് 50 കി.മീ വരെ വേഗതയിലും ചില അവസരങ്ങളില് 60 കി.മീ വരെ വേഗതയിലും വീശിയടിച്ചേക്കാവുന്ന ശക്തമായ കാറ്റിനും സാധ്യതയുണ്ടെന്നും അറിയിപ്പില് പറയുന്നു.
കേരള തീരത്ത് വിഴിഞ്ഞം മുതല് കാസര്ഗോഡ് വരെ സെപ്റ്റംബര് 13 രാത്രി 11.30 വരെ 2.5 മുതല് 3.1 മീറ്റര് വരെ ഉയരത്തില് തിരമാലക്കും കടലാക്രമണത്തിനും സാധ്യതയുണ്ടെന്നു ദേശീയ സമുദ്ര സ്ഥിതി പഠന ഗവേഷണ കേന്ദ്രം അറിയിച്ചിട്ടുള്ളതിനാല് മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണമെന്നു ജില്ലാ കളക്ടര് ഡോ. നവ്ജ്യോത് ഖോസ അറിയിച്ചു.
കടല്ക്ഷോഭം രൂക്ഷമാകാന് സാധ്യതയുള്ളതിനാല് അപകട മേഖലകളില് നിന്ന് അധികൃതരുടെ നിര്ദേശാനുസരണം മാറി താമസിക്കണം. മത്സ്യബന്ധന യാനങ്ങള് ഹാര്ബറില് സുരക്ഷിതമായി കെട്ടിയിട്ട് സൂക്ഷിക്കണം. ബീച്ചിലേക്കുള്ള യാത്രകളും കടലില് ഇറങ്ങിയുള്ള വിനോദങ്ങളും പൂര്ണമായും ഒഴിവാക്കണമെന്നും കളക്ടര് അറിയിച്ചു.
