ദേശീയപാതയിലെ കവര്‍ച്ച:​ സംഘത്തിലെ പ്രധാനികളെല്ലാം സി.പി.എം പ്രവര്‍ത്തകര്‍; പുറത്താക്കിയവരെന്ന് പാര്‍ട്ടി

കാസര്‍കോട്​: ദേശീയ പാതയില്‍ മൊഗ്രാല്‍ പുത്തൂരില്‍ 1.65 കോടി രൂപ കവര്‍ന്ന സംഭവത്തിന്​​ നേതൃത്വം നല്‍കിയത്​ കതിരൂര്‍ മനോജ്​ വധക്കേസിലെ ഒമ്ബതാം പ്രതി സിനില്‍.ഒളിവില്‍ പോയ ഇയാള്‍ക്കായി പൊലീസ്​ ലുക്ക്​ഔട്ട്​ നോട്ടീസ്​ ഇറക്കി.

സിനിലിന് പുറമെ സുഹൃത്ത്​ വയനാട്​ സ്വദേശി സുജിത്തും ചേര്‍ന്നാണ്​ കവര്‍ച്ച നടത്തിയതെന്ന് ഇന്‍സ്‍പെക്ടര്‍ അജിത് കുമാര്‍ പറഞ്ഞു​.

സ്വര്‍ണം വാങ്ങാനായി കാറില്‍ കൊണ്ടു പോവുകയായിരുന്ന 1.65 കോടി രൂപയാണ്​ കവര്‍ച്ച ചെയ്തത്​. മൊഗ്രാല്‍ പുത്തൂരില്‍ കഴിഞ്ഞ സെപ്റ്റംബര്‍ 22നാണ് സംഭവം.

മഹാരാഷ്ട്ര സ്വദേശിയായ സ്വര്‍ണ വ്യാപാരി കൈലാസിന്‍റെ പണമാണ് നഷ്ടപ്പെട്ടത്. കേസില്‍ ഏതാനും പ്രതിക​ളെ ഇതിനകം പിടികൂടിയിട്ടുണ്ട്​. ഇനി കിട്ടാനുള്ളത് പ്രധാന പ്രതികളായ സിനിലിനെയും സുജിത്തിനെയുമാണ്.

ദേശീയപാത വഴി കൊണ്ടുപോകുന്ന പണം കൊള്ളയടിക്കുന്ന സംഘത്തിന് നേതൃത്വം നല്‍കുന്നത്​ സിനില്‍ ആണെന്ന്​ പൊലീസ്​ പറഞ്ഞു.സി.പി.എം മാലൂര്‍ ബ്രാഞ്ച് സെക്രട്ടറിയായിരുന്നു സിനില്‍.

വയനാട് സ്വദേശി സുജിത്തും സി.പി.എം പ്രവര്‍ത്തകനാണ്​. നിലമ്ബൂരില്‍ നിന്ന് 84 ലക്ഷം രൂപ, ഒല്ലൂരില്‍ നിന്ന് 95 ലക്ഷം, കതിരൂരില്‍ നിന്ന് 50 ലക്ഷം എന്നിവ കവര്‍ന്നതും ഈ സംഘമാണെന്ന് പൊലീസ് കണ്ടെത്തി.

കവരുന്നത് ഹവാല പണമായതിനാല്‍ കേസ് ഉണ്ടാകില്ല എന്ന ധൈര്യത്തിലാണ് സംഘം പ്രവര്‍ത്തിക്കുന്നതെന്ന് പൊലീസ് പറയുന്നു. കൊല്ലം മുതല്‍ കാസര്‍കോട് വരെ ഇവര്‍ക്ക് ഏജന്‍സികള്‍ ഉണ്ട്.

ദേശീയപാതയിലൂടെ വന്‍ തുകകള്‍ കൊണ്ടുവരുന്നതിന്റെ കൃത്യമായ വിവരം ഈ ഏജന്‍സികളാണ് നല്‍കുന്നത്.ജയിലിലെ കൂട്ടുകെട്ടില്‍ നിന്നാണ് ഈ സംഘം ഉണ്ടായത്.

പുറത്തിറങ്ങിയപ്പോള്‍ ഇവര്‍ വലിയ വലിയ ഓപറേഷനുകള്‍ നടത്തുകയാണെന്ന് പൊലീസ് പറയുന്നു.സിനിലിന്റെയും സുജിത്തിന്റെയും പ്രധാന സഹായിയായ പ്രവര്‍ത്തിക്കുന്ന കണ്ണൂര്‍ പുതിയതെരു സ്വദേശി മുബാറക്കും സി.പി.എം പ്രവര്‍ത്തകനാണ്​. ഗ്യാങില്‍ ഇയാള്‍ അറിയപ്പെടുന്നത് ‘സഖാവ്’ എന്നാണ്.

എന്നാല്‍, ഇവരെയെല്ലാം പാര്‍ട്ടിയില്‍ നിന്ന് പുറത്താക്കിയതാണെന്ന്​ സി.പി.എം നല്‍കുന്ന വിശദീകരണം.