കോഴിക്കോട്: വെള്ളിമാടുകുന്ന് ചില്ഡ്രന്സ് ഹോമില് നിന്ന് കാണാതായ പെണ്കുട്ടികളെ ബലാത്സംഗം ചെയ്യാന് ശ്രമിച്ച കേസില് അറസ്റ്റിലായ പ്രതികളിലൊരാള് രക്ഷപ്പെട്ടു. ഇയാള് സ്റ്റേഷനില് വെച്ച് ഓടി രക്ഷപ്പെടുകയായിരുന്നു.
കൊടുങ്ങല്ലൂര് സ്വദേശിയ ഫെബിന് റാഫിയാണ് രക്ഷപ്പെട്ടത്. ഇയാള്ക്കായി തെരച്ചില് പുരോഗമിക്കുകയാണ്. കേസില് മൂന്ന് പ്രതികളുടെ അറസ്റ്റ് രേഖപ്പെടുത്തിയിരുന്നു. ഇതിന് പിന്നാലെ റാഫിയുള്പ്പെടെയുള്ള മൂന്ന് പ്രതികള്ക്ക് ബന്ധുക്കള് വസ്ത്രങ്ങള് എത്തിച്ചു നല്കിയിരുന്നു. വസ്ത്രം മാറുന്നതിനിടെ റാഫി ഓടിരക്ഷപ്പെടുകായിരുന്നുവെന്ന് പൊലീസ് പറഞ്ഞു.
ബെംഗളൂരുവില് വെച്ച് തങ്ങള്ക്കൊപ്പം പിടിയിലായ യുവാക്കള്ക്കെതിരെ പെണ്കുട്ടികള് മൊഴി നല്കിയിരുന്നു. യുവാക്കള് മദ്യം നല്കി ലൈംഗികമായി പീഡിപ്പിക്കാന് ശ്രമിച്ചെന്നാണ് പെണ്കുട്ടികള് പൊലീസിനോട് പറഞ്ഞത്.
പെണ്കുട്ടികള്ക്ക് സാമ്പത്തിക സഹായം നല്കിയ യുവാവിനെയും തിരിച്ചറിഞ്ഞിട്ടുണ്ട്. മലപ്പുറം എടക്കരയിലെ സുഹൃത്താണ് പണം നല്കിയത്. ഒരു കെ.എസ്.ആര്.ടി.സി ബസ് കണ്ടക്ടറുടെ അക്കൗണ്ടിലേക്കും, ഒരു ഇതര സംസ്ഥാനക്കാരന്റെ അക്കൗണ്ടിലേക്കും പണം നല്കാനാണ് പെണ്കുട്ടികള് ആവശ്യപ്പെട്ടത്.
ബെംഗളൂരുവില് എത്തിയശേഷം പെണ്കുട്ടികള് മുറിയെടുത്തു നല്കാനായി സഹായം തേടിയ യുവാക്കളാണ് പൊലീസിന്റെ പിടിയിലായത്. സഹായം ചെയ്തുതരാമെന്ന് വാഗ്ദാനം നല്കിയ യുവാക്കള് പെണ്കുട്ടികള്ക്ക് മദ്യം നല്കിയശേഷം ലൈംഗിക അതിക്രമത്തിനും മുതിര്ന്നുവെന്നും മൊഴി നല്കി.
