കാസര്കോട്: പള്സ് പോളിയോ ഇമ്മ്യൂണൈസേഷന് പരിപാടി ഫെബ്രുവരി 27 ഞായറാഴ്ച കാസര്കോട് ജില്ലയിലെ വിവിധ കേന്ദ്രങ്ങളില് നടക്കുകയാണ്. കോവിഡ് സാഹചര്യത്തില് കുട്ടികളുടെ സുരക്ഷ ഉറപ്പാക്കി കോവിഡ് മാര്ഗനിര്ദേശങ്ങള് കര്ശനമായി പാലിച്ചായിരിക്കും പോളിയോ പ്രതിരോധ തുള്ളിമരുന്ന് വിതരണം ചെയ്യുന്നത്.
ഫെബ്രവരി 27ഞായ്റാഴ്ച പ്രത്യേകം സജ്ജീകരിച്ച ബൂത്തുകള് വഴി പോളിയോ തുള്ളിമരുന്ന് നല്കുവാനാണ് ലക്ഷ്യമിടുന്നത്. തുളളിമരുന്ന് വിതരണം ചെയ്യുന്നതിനായി വോളണ്ടിയര്മാര്ക്കും ആശാ വര്ക്കര്മാര്ക്കും അങ്കണ്വാടി ടീച്ചര്മാര്ക്കും പരിശീലനം നല്കിയിട്ടുണ്ട്.
രാവിലെ 8 മണി മുതല് വൈകിട്ട് 5 മണി വരെ പ്രവര്ത്തിക്കുന്ന ബൂത്തുകളിലെ തിരക്ക് ഒഴിവാക്കുവാനായി ആരോഗ്യ പ്രവര്ത്തകര് നിര്ദ്ദേശിക്കുന്ന സമയത്ത് കുട്ടികളെ കൊണ്ടുപോയി തുള്ളിമരുന്ന് നല്കാന് അമ്മമാര് പ്രത്യേകം ശ്രദ്ധിക്കണം.
സ്കൂളുകള്, അങ്കണവാടികള്, വായനശാലകള്, ആരോഗ്യ സ്ഥാപനങ്ങള് എന്നിവിടങ്ങളിലെ ബൂത്തുകള്, ബസ് സ്റ്റാന്റുകള്, റെയില്വേ സ്റ്റേഷന് എന്നിവിടങ്ങളിലെ ട്രാന്സിറ്റ് ബൂത്തുകള് എന്നിവ വഴിയാണ് തുള്ളിമരുന്ന് വിതരണം നടത്തുന്നത്പോളിയോ ബൂത്തിലുള്ളവരും കുട്ടികളെ കൊണ്ടുവരുന്നവരും കോവിഡ് മാര്ഗനിര്ദേശങ്ങള് കര്ശനമായി പാലിക്കണം.
ബൂത്തുകളില് കുട്ടികളുമായി എത്തുമ്പോള് കൈകള് അണുവിമുക്തമാക്കുകയും ശരിയായ രീതിയില് മാസ്ക് ധരിക്കുകയും ശാരീരിക അകലം പാലിക്കുകയും വേണം.
കോവിഡ് മാര്ഗ നിര്ദേശങ്ങളനുസരിച്ച് തുള്ളിമരുന്ന് വിതരണം നടത്തുന്നതിനുള്ള എല്ലാ ക്രമീകരണങ്ങളും നടത്തിയിട്ടുണ്ട്. പ്രത്യേക പരിശീലനം നേടിയ ആരോഗ്യ പ്രവര്ത്തകരും വോളണ്ടിയര്മാരുമാണ് തുള്ളിമരുന്ന് വിതരണം നടത്തുക.
ഓര്ക്കുക രോഗ സാധ്യത ഒഴിവാക്കുവാനായി നമ്മുടെ കുട്ടികള്ക്ക് പോളിയോ തുള്ളിമരുന്ന് തുടര്ന്നും നല്കേണ്ടത് അനിവാര്യമാണ്. അതിനാല് എല്ലാവരും അഞ്ച് വയസിന് താഴെയുള്ള തങ്ങളുടെ കുട്ടികള്ക്ക് പോളിയോ പ്രതിരോധ തുള്ളിമരുന്ന് നല്കിയെന്ന് ഉറപ്പ് വരുതേണ്ടുന്നതാണ്.
