കാസർകോട്: പ്ലസ് വൺ വിദ്യാർത്ഥിക്ക് നേരെ റാഗിങ്. സീനിയർ വിദ്യാർത്ഥികൾ റാഗിങ്ങിന്റെ പേരിൽ പ്ലസ് വൺ വിദ്യാർത്ഥിയുടെ മുടി മുറിച്ചു.കാസർകോട് ഉപ്പള ഗവൺമെന്റ് ഹയർ സെക്കൻഡറി സ്കൂളിലാണ് സംഭവം.പ്ലസ് വൺ കൊമേഴ്സ്വിദ്യാർത്ഥിയായ അർമാന്റെ മുടിയാണ് ഒരുസംഘം സീനിയർ വിദ്യാർത്ഥികൾ ചേർന്ന് മുറിച്ചത്.പ്ലസ് ടു വിദ്യാർത്ഥികളാണ് റാഗിങ്ങിന് നേതൃത്വം നൽകിയതെന്നാണ് സൂചന. ബുധനാഴ്ചയാണ് സംഭവമുണ്ടായത്. റാഗിങ് ദൃശ്യങ്ങൾ പുറത്തു വന്നതോടെയാണ് സംഭവം പുറത്തറിഞ്ഞത്. വിദ്യാർത്ഥിയും പരാതിപ്പെട്ടിട്ടില്ലെന്നാണ് റിപ്പോർട്ട്. സംഭവത്തെപ്പറ്റി പരാതി ഇതുവരെ ലഭിച്ചിട്ടില്ലെന്ന് മഞ്ചേശ്വരം പൊലീസ് അധികൃതരും സൂചിപ്പിച്ചു.
