പൊതുവിദ്യാലയങ്ങളിൽ ഒന്നാംക്ലാസിൽ പ്രവേശനം നേടിയ കുട്ടികളുടെ എണ്ണത്തിൽ റെക്കോഡ് വർധന. രണ്ടുപതിറ്റാണ്ടിനിടയിലെ ഏറ്റവും കൂടിയ വർധനയാണ് ഇക്കുറി. മുൻവർഷത്തേക്കാൾ 28,492 കുട്ടികൾ പൊതുവിദ്യാലയത്തിൽ ചേർന്നു.
കഴിഞ്ഞവർഷം ഒന്നാംക്ലാസിൽ 2,76,932 കുട്ടികളാണുണ്ടായത്. ഇത്തവണയത് 3,05,414 കുട്ടികളായി. 1990-ൽ ജനസംഖ്യാനുപാതികമായി സംസ്ഥാനത്ത് കുട്ടികൾ കുറഞ്ഞശേഷം ഇതാദ്യമായാണ് ഇത്രയും കുട്ടികൾ ഒന്നാംക്ലാസിൽ ചേരുന്നത്. പൊതുവിദ്യാഭ്യാസ സംരക്ഷണയജ്ഞം തുടങ്ങിയ 2017-18 അധ്യയനവർഷം 12,798 വിദ്യാർഥികൾ ഒന്നാംക്ലാസിൽ അധികമായെത്തി. എന്നാൽ, 2019-20 വർഷത്തിൽ മുൻവർഷത്തേക്കാൾ 3422 കുട്ടികൾ കുറഞ്ഞു. 2020-21 വർഷം 8459 കുട്ടികൾ അധികമെത്തി.
പൊതുവിദ്യാഭ്യാസ സംരക്ഷണയജ്ഞത്തിനു ജനങ്ങളിൽനിന്നു ലഭിച്ച പിന്തുണയാണ് കുട്ടികളുടെ വർധനയ്ക്കു കാരണമായി അധികൃതർ പറയുന്നത്.2017-18 മുതൽ 2020-21 വരെ പൊതുവിദ്യാലയങ്ങളിൽ 6.80 ലക്ഷം വിദ്യാർഥികൾ അധികമായെത്തി.
