പലയിടങ്ങളിൽ നിന്നും ഭക്ഷണം പാകം ചെയ്യുന്നത് നാം കണ്ടിട്ടുണ്ട്. എന്നാൽ തീ തുപ്പുന്ന അഗ്നിപർവ്വതത്തിൽ നിന്നുള്ള ഭക്ഷണം പാകം ചെയ്യൽ ഒരു പക്ഷെ ആദ്യമായിരിക്കും. ഗോട്ടിമലയിൽ നിന്നുള്ള 34 കാരനായ ഡേവിഡ് ഗ്രേസിയ ആണ് ഇത്തരം ഒരു സാഹസത്തിന് മുതിർന്നത്.
ഗോട്ടിമലയിലെ പക്കായ എന്ന സജീവ അഗ്നിപർവ്വതമാണ് ഡേവിഡ് ഗ്രേസിയ തൻ്റെ അടുക്കളയായി മാറ്റിയത്. ലാവ വന്ന് കൊണ്ടിരിക്കുന്ന മേഖലയിൽ നിന്ന് ഒന്നാന്തരം പിസയാണ് ഇദ്ദേഹം നിർമ്മിച്ചത്. പക്കായ പിസ എന്ന പേരും ഡേവിഡ് ഇതിന് നൽകിയിട്ടുണ്ട്. മിലിട്ടറി ബൂട്ട് ഉൾപ്പടെയുള്ള സുരക്ഷാ കവചങ്ങൾ ധരിച്ച് അഗ്നിപർവ്വതത്തിൽ നിന്ന് പിസ ഉണ്ടാക്കുന്നതാണ് വീഡിയോ ദൃശ്യങ്ങളിൽ ഉള്ളത്. താപനില 1800 ഫാരൻഹീറ്റ് വരെയായി നിലനിർത്തുന്ന പ്രത്യേക തരം മെറ്റൽ ഷീറ്റ് ഇദ്ദേഹം ഉപയോഗിച്ചിരുന്നതായാണ് വിവരം.
പിസ തയ്യാറാക്കി അഗ്നിപർവ്വതത്തിലെ 800 ഡിഗ്രി താപനിലയിലുള്ള കുഴിയിൽ ഇട്ടാണ് പാകം ചെയ്തതെന്നും 14 മിനിട്ടിനുള്ളിൽ ഇത് പൂർത്തിയായെന്നും വാർത്താ ഏജൻസിയായ എഎഫ്പിയോട് ഡേവിഡ് വിശദീകരിച്ചു. അഗ്നിപർവ്വതത്തിൽ നിന്നും ഉണ്ടാക്കിയ പിസ ഏറെ രുചികരമായിരുന്നു എന്നും അദ്ദേഹം അഭിപ്രായപ്പെട്ടു. അഗ്നി പർവ്വതത്തിൽ വച്ചുള്ള ഡേവിഡിൻ്റെ പിസ തയ്യാറാക്കൽ കാണാൻ ധാരാളം സഞ്ചാരികളും മറ്റും അവിടെ തടിച്ച് കൂടിയിരുന്നു. അഗ്നിപർവ്വതം കാണാൽ എത്തുന്ന സഞ്ചാരികൾ ഡേവിഡിൻ്റെ അടുക്കളയിലും സന്ദർശനം നടത്തി. ഇദ്ദേഹം പിസ പാകം ചെയ്യുന്ന ട്വിറ്റർ വീഡിയോ ചുവടെ കാണാം.
