തിരുവനന്തപുരം: സംസ്ഥാനത്ത് ഇന്ന് ഒറ്റപ്പെട്ട ശക്തമായ മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രം. വെള്ളിയാഴ്ച വരെ ഇടിമിന്നലോടു കൂടിയുള്ള മഴയുണ്ടാകുമെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ഉച്ചക്ക് രണ്ട് മുതല് രാത്രി 10 മണി വരെയുള്ള സമയങ്ങളില് ഇടിമിന്നലിന് സാധ്യത കൂടുതലായതിനാല് ജാഗ്രത പാലിക്കണമെന്ന് ദുരന്ത നിവാരണ അതോറിറ്റി അറിയിച്ചു.
അടുത്ത മൂന്ന് മണിക്കൂറില് കേരളത്തില് തിരുവനന്തപുരം, ആലപ്പുഴ എന്നിവിടങ്ങളില് മറ്റ് ജില്ലകളേക്കാള് ശക്തമായ മഴയ്ക്കും കാറ്റിനും സാധ്യതയുണ്ട്. 40 കിലോമീറ്റര് വരെ വേഗതയില് കാറ്റ് വീശിയേക്കാമെന്നാണ് കാലാവസ്ഥ വകുപ്പ് അറിയിച്ചിരിക്കുന്നത്. കടലില് പോകുന്ന മത്സ്യത്തൊഴിലാളികള് ജാഗ്രത പാലിക്കണം.
ഇടിമിന്നല് ലക്ഷണം കണ്ടാല് തുറസായസ്ഥലങ്ങളില് നില്ക്കുന്നത് ഒഴിവാക്കണം. ജനലും വാതിലും അടച്ചിടണം. ഗൃഹോപകരണങ്ങളുടെ വൈദ്യുതി ബന്ധം വിച്ഛേദിക്കണം. വൈദ്യുതി ഉപകരണങ്ങളുമായുള്ള സാമിപ്യം ഒഴിവാക്കണം. ഇടിമിന്നല് സമയത്ത് ടെറസിലോ ഉയരമുള്ള സ്ഥലങ്ങളിലോ ഇരിക്കരുതെന്നും നിര്ദേശമുണ്ട്.
