തിരുവനന്തപുരം: ഹാക്കർമാരുടെ പുതിയ കെണിയിൽ അകപ്പെടരുതെന്ന മുന്നറിയിപ്പുമായി കേരളാ പൊലീസ്. ഈയിടെയായി കണ്ടുവരുന്ന ഹാക്കർമാരുടെ പുതിയ തട്ടിപ്പ് രീതിയാണ് ചില ലിങ്കുകൾ അയച്ച ശേഷം ലിങ്കിൽ കാണുന്ന വിഡിയോയിൽ നിങ്ങളാണെന്നും അല്ലെങ്കിൽ, കാണാൻ നിങ്ങളെ പോലെയിരിക്കുന്നു എന്നു പറയുകയും, തുടർന്ന് ഈ സന്ദേശം ലഭിക്കുന്ന വ്യക്തി ലിങ്കിൽ കയറുയും ഉടനെ ഇയാൾ ഹാക്ക് ചെയ്യപ്പെടുകയും ചെയ്യുന്നു.
ഇതിനെതിരെയാണ് പൊലീസ് നിർദേശം നൽകിയിരിക്കുന്നത്.ഇത്തരം ലിങ്കുകൾ തട്ടിപ്പുകാരുടെ കെണികളാണ്. കാഴ്ചയിൽ ഒറിജിനലിനെ പോലെ തോന്നിക്കുന്ന ഇത്തരം സൈറ്റുകളുടെ ലിങ്കുകൾ എസ്എംഎസ് ,ഇ മെയിൽ,മെസഞ്ചർ തുടങ്ങിയവ വഴിയാണ് തട്ടിപ്പുകാർ പ്രചരിപ്പിക്കുന്നത്.
ഒറ്റനോട്ടത്തിൽ സംശയിക്കപ്പെടാൻ സാധ്യത ഇല്ലാത്ത ഇത്തരം ലിങ്കുകളിൽ ക്ലിക്ക് ചെയ്യുന്നതിലൂടെ സ്വകാര്യ വിവരങ്ങൾ കൈവശപ്പെടുത്തി പണം തട്ടിയെടുക്കുകയാണ് ഹാക്കർമാരുടെ ലക്ഷ്യം. ഭീഷണിപ്പെടുത്തുക, സമ്മർദ്ദം ചെലുത്തുക തുടങ്ങിയവയും ഇവരുടെ അടുത്ത ഘട്ടത്തിലെ രീതികളാണ്’, കേരളാ പൊലീസ് മുന്നറിയിപ്പ് നൽകി.
